اسمعوا يا شباب منى قبل ما تقعوا فى الخطيئة ؟؟ ممنوع الدخول؟؟ لانى ندمان على الموضوع دة

نصائح للي عايز يخطب او يتجوز اوبيفكر بس يعملها





اسمع منى بدل ما تتبهدل وتمشى تكلم نفسك فى الشارع شوف يا برنس

اولا .. العروسة الشروط والموصفات القياسية التابعة لوزرة الصحة ومنظمة حقوق الانسان

الوزن 50 كجم الحد الأقصى انا عارفك طفس بتحبها طويلة بيضاء رشيقة كل ده مش مهم كلها سنة واحدة بعد الجواز وكله هيتملى و كله هيبقى سود عليك وعلى اليوم اللى اتجوزت فية

التخن (انت ونصيبك وكل واحد على قد نيته) طويله/قصيرة ( صدقنى حتى الطوال بعد الجواز بيقصروا حاجة ربانى يعنى) ولو مش مصدقنى اسأل اى حد متجوز بص له بس انت حتعرفه على طول حتلاقيه ماشى موطى فى الأرض و بيعيط اديله منديل وخد رأيه وانا متأكد انه حينصحك وهات لفتين ثلاثة بكرة مناديل أكيد حتحتاجهم أوعى تعيط جنبه دورك فى العياط لسه ما جاش .

حاجة كمان فبل ما انسى .... دقق قوى فى عيلتها واتأكد ان ما فيش واحد محامى يكون قاريبها .. جارها.. صاحب أخوها ... أحسن ولا مؤأخذة حتبقى فضيحتك بجلاجل وتلاقى نفسك مع أول مشكلة مخلوع وتلاقى الناس فى الشارع بيشاوروا عليك وبيضحكوا وتلاقى ولادك بيتشتموا ويتقال لهم يا ولاد المخلوع

(ابوها) .. اللى هيكون حماك

مهم جدا أبوها نصيحتى بلاش يكون موظف قاعد فى البيت ليل نهار- والعملية مش ناقصةوطبعا بلاش رجال الأعمال انت مش ناقص اللى عنيهم زايغة على السكرتيرات واموال البنوك يا عينى عليك وبلاش كمان يكون اعمال حرة او صاحب محل وبعدين مباحث التموين مش سايبه حد فى حاله وبعدين انت حتخطب بنتة ولا حتجرى ورا ابوها فى اقسام البوليس ............ ,,,,, نلتقى بعد الفاصل

فقرة اعلانية

اعلان (اشترى كريم فير اند لفلى ) وخد رباط ضغط مجاااااااانا

عــدنــــا

أبوها : أزاى تعرف من أول مقابلة مع ابوها انه راجل كويس او لأ ؟؟

أول ما تقعد معاه وتطلب أيد بنته حيعمل حاجة من أثنين

الأولى : حيوطى على ايدك يبوسها وده معناه انه راجل محترم وعارف قيمة بنته ومصايبها وعارف قيمة العريس اللى جاى يخطب فى الزمن المهبب ده وعارف معنى ان واحدة حتغور من وشه بس خللى بالك احنا فى موسم الأوكازيونات احسن يطمع و يفاوضك تاخذ عروستين بدل واحدة ( ويعمل لك خصم على الثانية ) وممكن كمان يدعى لك ان ربنا يصبرك وسيظل يؤكد انه بيشترى راجل واطلع انت انصح منة واللى عاوز يشترى يدفع وللا ايه

الثانية : حيحط رجل على رجل ويقولك ايوه يا بنى انت قولتللى بتشتغل ايه ؟؟؟

وبعدين عشرين تلاتين سؤال وانت هيمغى عليك يبقى قدامك رد من الاتنين

الأول : ايه ده يا عمى هوه انا أخطب وللا جاى اتسأل ؟؟ وبعين السؤال ده صعب قوى ممكن اتصل بصديق ؟؟ هوه أنت ما تعرفشى انا مين وللا ايه ؟؟ العصر بتاع الأسئلة دى كان زمان يا عمى احنا فى عصر الكاميرا والنت.. فاهم حاجة يا باشا ؟؟؟؟ عموما انا حاسيب لك ال إى مييل بتاعى أبقى ابعت لى ايمييل وكفى الله المؤمنين القتال .انت شكلك طيب ومش وش بهدلة يا عمى والحمد لله لاقيت الي ينقذك من بنتك

الرد الثانى (منصحكش بيه خالص) : يا عمى انا مخلص الكلية من خمس سنين والحمد لله كنت بأوفر كل مليم كان أبويا بيدهولى مصروفى طول السنين الخمسة الماضية وقدرت اعمل جمعية واجهز ثمن الشبكة والخطوبة صحيح مش حتبقى خطوبة كبيرة بس ان شاء الله فى الفرح حنعمل زيطة وزمبليطة وحنوزع حتتين جاتوه وساندوتش بسطرمة على كل المعزوميين

وفى الحالة ديه هتلاقي نفسك امام سيل من الأسئلة البايخة مثل :

أفهم من كده انت ما عندكشى شقة ؟؟

ولا اشتريت الأجهزة الكهربائية ولا الكمبيوتر ابو مايك وكاميرا

يا عينى عليكى يا بنتى عاوزينى أجوزك من غير شات وماسنجر ؟؟؟؟

وفية رد تانى ممكن تسمعة من ابو العروسة :

وبعدين ايه قصة حوشت مصروفك هوه انت ما بتشتغلشى أتفضل يا فندى معندناش بنات للجواز .. !!!

نصائح عامة لأول لقاء مع والدها

بلاش نظام البدل وبلاش نظام جيل الشعر المعفن ده وبلاش كمان الجينز المقطع وبلاش حد من اهلك يروح معاك اول مرة خليها حلوة .كلمة من هنا وملاية تتفرش من هناك حتبقى سلطة وبعد اول زيارة مش حتقدر تغمض عينيك ( من الوجع طبعا)

بلاش نظام الشيكولاته الغالية والجاتوهات الفخمة اول زيارة انا عارفك سخى وصريف خليهم تالت او رابع زيارة ان كان فى يعنى ... ماهو مش معقول نتشتم ونترفض وناكلهم جاتوة وللا انت رأيك ايه ؟؟

بلاش تشرب تشرب عصائر وتاكل جاتوة او اى حاجة عندهم اول زيارة ... اتقل شوية الناس تقول اية مبيشوفش الحاجات دى فى بيتهم ومقضينها شاى فية ناس كتير كانت عاقلة وعملتها وبعد ما شربت وكلت جاتوة كلو على قفاهم بعد كدة هتفضل تشرب المر طول حياتها يا برنس

لو ابو العروسة قام شوية ماتقلقشى حتلاقى قدامه شوية مواعيين عاوز يغسلهم او حتتين غسيل مستعجليين عليهم وطبعا لا داعى للأحراج لما تلاقيه رجع و لو لاقيت أثار الصابون على ايده قوله (كلنا لها)

والسلام ختام ومتنساش تعزمنا على الفرح ............... بس علشان ناكل يعنى

زيكا بيدحرج المسا على كل اللى فى المنتدى وجميع القيادات وحلى مسى للاسطورة وجمعة والعلقامى والخطيب والخواجة ها الخواجة يا جدعان وعلى كل الناس الجديدة اللى دخلت المنتدى وانا لسة معرفهاش